VOSA E NA KENA DOLAVI NA BAI NI UA E NA KORO O DAKUNI, BEQA

Ni sa tiko na Gone Turaga na Tui Sawau;
Na Turaga na Taukei Vagadra;
Na Turaga na Tui Raviravi;
Na lewe ni Vanua o Beqa
Ni tiko talega na Cakacaka Vakamatanitu ni yaco rawa mai e na
Yakavi Vinaka ni Kua.

Ni sa Bula Vinaka.

Au vakavinavinaka vakalevu e na Veiqaravi Vakaturaga ka sa mai qaravi rawa e na vuku ni Matanitu e na siga ni kua.

Na siga ni kua, e dua na siga marautaki vei keda taucoko na tiko rawa, ka dua talega na siga guiguilecavi dredre veikemuni na lewenivanua e na koro ko Dakuni e na kena tavoci na nomuni Bai ni Ua.

Au gadreva me’u taura na gauna oqo, me’u vakavinavinakataki kemuni na Turaga na iTaukei Vagadra e na nomuni vakadonuya me viri vakavinaka na Bai ni Ua ni nodatou koro ka maroroi keda vinaka na lewe ni koro kei na noda iyau kece sara mai na seuseua ni waitui kei na leqa tubu koso.

E vakayagataki e $85,000 e na kena tara na Bai ni Ua oqo mai vei iratou na Matai kei na Idinia ni noda Matanitu. E $15,000.00 e a qai vakayagataki me laki vakavinakataki kina na Bai ni Ua e Dakuibeqa, na nodra koro na Turaga na Tui Sawau me maroroya na Valeniwai e Beqa.

E vakavinavinakataki vakalevu na yalo ni veitokoni e tiko e na loma ni nodatou koro e na nodra vukei ka tokoni na Matai kei na Idinia ni Matanitu e na kena vakacavari vakavinaka na cakacaka levu oqo. Qo sa i dusidusi levu ni veitokoni ni Turaga na Tui Sawau kina veivakatorocaketaki ni Matanitu veiliutaki ka sa veivakadeitaki talega ni na tokoni na kena tomani tale na tara ni bai ni ua e na yabaki mai oqo, 2014 e na kena sa vakadonui oti e $100,000.00 me baleta na cakacaka ni veimaroroi oqo.

Sa veivakailavotaki talega na Matanitu e na kena ta e dua na waqa kei na kena idini, ka nuitaki ni sa na veivuke tiko kina nodra vakaleleci na gonevuli kina koronivuli o Beqa Yanuca Secondary School ka dola mai e na mataka ni kua.

Sa toso cake na i lavo ka solia na Matanitu kina veikoronivuli ka na levu na i lavo e na vagolei vei ira na koronivuli lewe levu na lewena. Noqu ivakasala vei ira na i Tubutubu kei na Dauniveisusu ko ni vakauti ira tiko na luvemuni ki Viti Levu mera suka mai me mai tawani na nodatou koronivuli.

Au vakavinavinaka tiko vakalevu e na teitei sa qaravi tiko, ka nuitaki ni na tosoi cake e na yabaki vou me vakayagataki kina na iyau levu na qele e na nodatou yanuyanu kei na noda vakayagataka na Daunivakasala ni Tabana ni Teitei e rau tiko qo e Beqa.

E na yabaki vou e na tara talega kina eke e dua na vale me soqona na nomuni voli ka me qai kau yani ki Viti levu. Qo me na vaqaqacotaka na kena yavutaki na iSoqosoqo ni Veivoli ni Tikina o Sawau ka tara talega e dua na vale me soqona na nomuni ivoli ni Tikina o Raviravi e na koro o Raviravi.

Me’u tinia vei keda na leweni vanua e na yakavi ni kua, ni sa rui ka bibi talega na kena qaravi vakavinaka tiko na bai ni ua e na veiyabaki, me rawa ni vakayacora tiko kina na nona itavi bibi ni veimaroroi. Me ra botani na tikini bai ni ua era kabasu ka teivaki e na senikau me solia e dua na i rairai vinaka ka bulabula e na mata ni nodatou Koro o Dakuni. Sa noqu vakatutu ni kua mo dou raica vata kei na Vakailesilesi mai na Valenivolavola ni Yasana, Mata ni Tikina o Sawau/Raviravi, 9 na Turaga ni Koro e Beqa kei na Tabacakacaka ni Bula, na vakanananu ni veisivisivi koro savasava ka bulabula ka me ratou qai veivakaicocovitaki mai kina na 6 na otela e ratou dabe toka e na nodatou vanua.

Na vakatutu qori e solia e dua na yalo ni bolebole kina noda tiko vinaka kei na marau.

E na vica na mala ni vosa oqori e sa ka dokai kina vei au me’u mai tavoca na Bai ni Ua e Dakuni ka’u sa vakanuinui tu ni na noda vata na Marau ni Siga ni Sucu kei na Tawase ni Yabaki.

Vinaka Vakalevu.